ጠቅላይ ሚኒስትሩ ችግር ውስጥ የነበሩ 137 ኢትዮጵያውያንን ይዘው ተመለሱ

ከአሥር ሺህ በላይ ሕጋዊ መረጃ ላልነበራቸው ኢትዮጵያውያን የቪዛና የሥራ ፈቃድ እንዲያገኙ ተደርጓል

ኢዛ (እሁድ የካቲት ፰ ቀን ፳፻፲፪ ዓ.ም. February 16, 2020)፦ ጠቅላይ ሚኒስትር ዶ/ር ዐቢይ አሕመድ ወደ መካከለኛው ምሥራቅ በመጓዝ ከኢትዮጵያውያን ጋር የነበራቸውንና በተያያዘ ሥራ አጠናቅቀው ሲመለሱ፤ በተባበሩት ዐረብ ኤምሬትስ ከአገር እንዳይወጡና ከፍተኛ ችግር ውስጥ የነበሩ 137 ኢትዮጵያውያንን ጉዳይ በማስጨረስ፤ ወደ ኢትዮጵያ ይዘው ተመልሰዋል።

ከተባበሩት ዐረብ ኤምሬትስ ጋር በመነጋገርና በማስፈቀድ ኢትዮጵያውያኖቹ ምሕረት እንዲደረግላቸው በማድረግ፤ ይህ ብቻ ሳይሆን ሌሎች በዚያ የሚገኙና ከ10 ሺህ በላይ የሚኾኑ ሕጋዊ ፈቃድ ሳይኖራቸው በተለያዩ መጠለያዎች ያሉ ኢትዮጵያውያን በሕጋዊ መንገድ መንቀሳቀስ እንዲችሉ የተፈቀደ መኾኑ ታውቋል።

በጉዳዩ ላይ ማብራሪያ የሠጡት አምባሳደር ሱሌይማን ደደፎ፤ እነዚህ ሕጋዊ መረጃ ያልነበራቸው ኢትዮጵያውያን ቪዛ እንዲያገኙ ጭምር የተባበሩት ዐረብ ኤምሬትስ የተፈቀደ ሲሆን፤ ወደ ኢትዮጵያ መመለስ የሚሹም ኾነ እዚያው መሥራት ለሚፈልጉ እድሉ ተመቻችቶላቸው የሥራ ፈቃድም እንዲያገኙ መደረጉን ገልጸዋል። (ኢዛ)